محمد صبحي يلوم منى زكي بسبب «الست».. ويروي موقفا مؤثرا مع أم كلثوم
فاجأ الفنان محمد صبحي الجميع بالهجوم على صناع فيلم "الست" ووجه عتابًا وتلويحًا باللوم إلى النجمة منى زكي بخصوص مشاركتها في فيلم "الست"، وشدد على أن الممثل يجب أن يتحرى الحقيقة ويتجنب الوقوع في فخ التشويه أو البعد عن واقع الشخصيات العظيمة.
كما استرجع صبحي موقفا شخصيا مؤثرا ونادرا جمعه بكوكب الشرق أم كلثوم، مستخدماً هذه الواقعة لتسليط الضوء على الكرم والأخلاق الرفيعة للراحلة أم كلثوم.
وقال محمد صبحي في تصريحات تلفزيونية: "أنا كممثل، عندما يعرض عليّ فيلم أو مسرحية قد تكون عظيمة وبارعة ولكنها قد تكون مخالفة للحقيقة لا يمكن أعملها، وأنا بلوم على تلميذتي وحبيبتي منى زكي، وأنا أفتخر بها، أن تقع في مثل هذه الوقيعة".
وأضاف: "الست أم كلثوم أنا اشتغلت وأنا في إعدادي ببيع التذاكر بتاعتها في شباك التذاكر على حفلاتها، وكنت بشوف احترام الناس ليها وهم جايين يشتروا التذاكر".
حقيقة بخل كوكب الشرق أم كلثوم
وتابع محمد صبحي: "أم كلثوم طلعوا عليها شائعة إنها بخيلة.. ده مفيش أكرم من السيدة أم كلثوم".
وأوضح صبحي: "في مرة قطعت تذكرة بـ 3 جنيهات وكنت باخد وقتها جنيه في اليوم، وده عشان أقعد في الصف الأول أسمعها، ولقيت صاحب الحفلة الخيرية جاي بيقولي الست أم كلثوم عايزة الكرسي ده لحد من ضيوف مصر، ورفضت، فراح قالها في غرفتها فقالتله هاتهولي".
وتابع: "دخلت الغرفة بتاعتها ولقيتها التفتت للباب، وقالت (إيه ده.. ده عيل.. يا ابني أنا عندي ضيف مهم ولازم يقعد على الكرسي ده)، فقولتلها ( أنا أهم، عايز أسمعك وأفتخر اني قعدت في الصفوف الأولى عشان أسمعك يا ست الكل)، رجعت قالتلي (هقعدك في مكان أحسن من أول الصف، وبكيت، فخدتني من إيدي وقالتلي هغني وأبقى بصالك بغنيلك أنت، وبعد ما خلصت الحفلة ادتني ظرف فيه 50 جنيه".
وأضاف: "أم كلثوم قامة كبيرة محدش هيقدر يكسرها، ودايما بقول لزملائي الفنانين إذ كنت عامل سيرة ذاتية لفنان أبعد عنها، أنا مش عايز أتفرج على نجيب الريحاني إتجوز ولا طلّق ولا عاش مع مين.. أنا أناقش حياته الفنية ولا أقترب من حياته الأسرية أو العادية بشوف معاناته عشان يقدم فنه.. ولا يصح أقدم حياة شخصية لفنان لأن هيبقى فيها الكذب أكتر وأكتر".